’جب رضوان سے کہا گیا تمہارے کیریئر کا آج آخری میچ ہے‘

 ویب ڈیسک 

قومی ٹیم کے وکٹ کیپر بیٹر محمد رضوان نے ٹی 20 رینکنگ میں نمبر ون پوزیشن پر آنے پر گفتگو کی ہے۔

پاکستان کرکٹ بورڈ (پی سی بی) کی جانب سے انسٹاگرام پر محمد رضوان کی ویڈیو شیئر کی گئی جس میں وہ رینکنگ میں نمبر ون آنے پر گفتگو کررہے ہیں۔

ماضی میں نیوزی لینڈ کے خلاف میچ سے قبل افتخار سے ہوئی گفتگو پر بات چیت کرتے ہوئے محمد رضوان نے بتایا کہ مجھے اس روز گاڑی میں افتخار نے کہا تھا کہ رضوان تمہارے کیرئیر کا آج آخری میچ ہے۔

انہوں نے بتایا کہ مجھے پی ایس ایل میں بھی نہیں کھلایا جا رہا تھا اور مجھے لگ رہا تھا اب مجھے ٹی ٹوئنٹی ورلڈ کپ بھی نہیں کھلایا جائے گا لیکن بس محنت کرتا تھا اور اللہ سے دعا کرتا تھا اللہ نے مصباح بھائی کے ذہن میں ڈالا اور انہوں نے مجھ سے اوپننگ کرائی۔


 محمد رضوان کا کہنا ہے کہ ’مجھے نمبر ون بن جانے پر بس اتنی خوشی ہے کہ اللہ نے وہ مقام دیا جس پر لوگ کہتے تھے کہ رضوان چھکا نہیں مار سکتا ورنہ میں اور بابر اعظم الگ نہیں ہیں‘۔

محمد رضوان نے کہا کہ مجھ میں اور کپتان بابر اعظم میں کوئی فرق نہیں ہے نمبر ون وہ ہوں یا میں کوئی فرق نہیں پڑتا زیادہ خوشی یہ ہے کہ ریکارڈ پاکستان کے پاس تھا اور پاکستان کے پاس ہی ہے، میرے ذریعے بھی رینکنگ پاکستان کے پاس ہی آئی ہے۔